Kuqezinjtë të shtunën në Kratovë ndeshen me Sileksin në kërkim të suksesit të radhës për ruajtje të pozitës së parë.
NDESHJA
Sileksi vs Shkëndija
Liga e Parë, xhiroja e nëntë
Stadiumi i qytetit, Kratovë
E shtunë, 5 tetor, ora 14:00
Pas fitores së thellë 4:0 ndaj Vardarit, Shkëndija udhëton drejt Kratovës për t’u përballur me Sileksin. Me atmosferë pozitive dhe rikthimin në krye të tabelës, kuqezinjtë synojnë të vazhdojnë formën e mirë dhe të ruajnë pozicionin lider në kampionat. Skuadra ka punuar intensivisht gjatë javës për këtë përballje, me qëllim që të vazhdojë serinë e fitoreve.
Skuadra
Zija Merxhani do të mungojë për shkak të një dëmtimi të pësuar në ndeshjen e fundit, por lajmi i mirë është kthimi i plotë i Ronaldo Websterit, i cili është gati për lojë pas rikuperimit.
Kundërshtari
Sileksi është aktualisht në vendin e katërt pas tetë xhirove, me 13 pikë të grumbulluara nga 4 fitore, 1 barazim dhe 3 humbje. Ata vijnë në këtë sfidë pas dy ndeshjeve si mysafirë, duke mundur Vardarin 0:1 dhe barazuar pa gola me Tikveshin. Ekipi është treguar mjaft solid këtë sezon dhe pritet të jetë një kundërshtar i fortë në shtëpinë e vet.
Transmetimi
Ndeshja Sileksi-Shkëndija do të transmetohet drejtpërdrejt në kanalin zyrtar të klubit në Youtube (Shkëndija Channel), me fillim në ora 14:00 të shtunën.
